Vilnius

Rillingen

Kaunas zoot erop, wat 'n fijne ervaring waar det! Vilnius is maar 'n eurke riejje, en ik woei ongerweges nog get dingen doon. Eine daorvan waar het oorlogsmuseum/monument net boete Kaunas. Ouk 'n aanrader. Veur maar 3 knaken heesse 'n best aardig museum en 'n memorial veur oorlogsslachtoffers. Op 'n gegaeve moment wuurdt het thema stieds donkerder. Het deej mich zelfs op sommige moment aan Auschwitz deed dinken qua heftigheid. Ouk heej zien verschrikkelijke dingen gebeurd. Van binnen heb ik gin foto's gemaakt oet respect veur de slachtoffers.

Het monument boete is enorm van omvang en imposant um te zeen.

Electrotechnique

Efkes verderop leet de plaats Elektrenai. Dit stedje is gebouwd in de Sovjettied veur de werknemers van de (toendertied) op ein nao groëtste energiecentrale van Litouwen. Vandaar de naam Elektrenai. Met de sloeting van angere centrale is de Elektrenaicentrale dé energiebron veur Litouwen. Zoë wie het toen huurde is er 'n compleet stedje bestaonde oet hoegbouw opgetrokken, hetgeen neet echt charmant is. Wál is er aan alles gedacht: 'n ieshockeyclub, 'n pretpark, 'n strand aan het meer (det het water veur de centrale levert). 

Ik waar geïntrigeerd door het pretpark. Ik zoog op internet foto's van 'n verlaote pretpark in Litouwen en det bleek dit park te zien. Begreujde attracties, roestige constructies: det leek mich tof! Helaas veur mich maar fijn veur de bewoëners wuurdt het gebied beej het pretpark opgeknapt tot 'n niej stadspark. Op het terrein werd flink gebouwd. Ik kos toch nog 'n glimp opvangen van de achtbaan. Och, ik bin er geweest, heb nog ff ronkgekeken en nog 'n foto van de prachtige moderne kerk gemaakt.

Het leven is een wervelstorm, hier in

Dukštaī, woehoe! Daor zou ik 'n wandeling doon, de Dukštaī Educational Trail. Het raegende nog stieds, maar ik dacht ik rie er gewoen naortoe: drek doorriejje naor Vilnius en daor naat waere is ok gin pretje. Einmaol aangekomen raegende het nog det t zèkde. Ik dacht misschien ff 'n fotoke maken van het oetzicht, maar det waar neet zoevuul. Jammerbammer. Door naor Vilnius dan maar. Bliksems 't is wat!

Vilnius, de hoofdstad van Litouwen. Barokke gevels euveral, pastelkleuren wie aan de Middellandse zieë. De waans dich in Italiaanse sferen. Ondanks de raegen den, want het raegende nog immer. De aovend veel dus 'n bietje in het water, maar doënbeej de plek waor mien auto geparkeerd stong (inmiddels ingeleverd) heij ik 'n pizzatentje gezeen: Slice! Deze waar nog neet zoe lang geleeje geopend en kreeg gojje reviews, dus daor maar gaon preuve. En de pizza waar lékker! D'r mot hiel get gebeuren wil dae euvertroffen waere.

#Lekkersmikkelen

De volgende morge vruug opgestaon en ontbeten beej Fairytale Coffee. Zeute det ik bin. Nae echt, klein tentje, met 10 persoene zit het al vol. Lekkere cappuccino, spek met ei, salade. Jumjum. Langzaam kwaam ik erachter det vandaag niks open zou gaon. De Baltische staten hebben 'n strikter beleid ingevoerd wegens Covid-19 waordoor musea, toeristische attracties en angere leuke dinger gesloten motten blieven. Wat blieft er euver: wandelen! Ik mot zeggen det ik det wal langzaamaan veul aan de bein. Never skip legday! Dus maar door de stad gebonjourd en de stad is moei. Door de gesloten dingen wal 'n bietje kil, maar daor mosse maar doorhaer kieke. Alle belangrieke gebouwen minstens 2 kier veurbeej gelaupe, de heuvel beklommen en minsen gekeken. De wijk Uzupis ("aan de angere kank van de rivier")  mos ouk interessant zien. De aoje joodse wijk mos 'n walhalla zien veur kunsteneers en vrije geesten. Zelfs de Dalai Lama is er 'ns gewaes! Helaas mos ik constateren det het 'n bietje aan de commercie ten onger is gegaon: nieuwbouw, winkels, gelikt opgepoetste gevels. Neet echt zoe cool as men schetste. Ze zien wal dinger aan het verbouwen um het weer knusser en hipper te maken, dus misschien euver 'n paar jaor nog 'ns proberen.

Lunchen deej ik beej NO FORKS, 'n Mexicaans restaurant. Burrito, dieke kop soep en drinken veur €6. Duchtig! Gin vork gebroekt, weinig geknoeid (leugen) en soep gehad. Bejao, det heb ik vuuls te weinig gehad: soep. Misschien in Minsk (Minskien hahahoe) maar Borsjt proberen. Nog 'n ronde stad den maar? U vraagt, wij draaien!  En zo geschiedde. Het werd langzaam donker en det waar schoen um te zeen. De tas op de kamer neergelag en nao de zoevuulste dwaalgang door de stad beej Jurgis ir Dragonas gegaete. Dit zoog ik liggen in de stad en ik dacht: heej, det mot St. Joris en de Draak beteikenen (correct overigens). De zaak zoog er klein en knus oet, dus daor ging de queeste naortoe. Er stong det ze traditionele gerechten en pizza's verkochten. Ik woei natuurlijk 'n traditioneel gerecht, genog pizza's gehad. Maar tot mien spiet waren ze de kaart aan het verangeren zoedet er nog allein maar Italiaanse gerechten opstongen. Lasagne den maar, en dae waar dieke prima. 't Waar tied um naor de kamer te gaon, ik waar het vuule laupe wal käök noow. 

Potverjandriedubbeltjes

Op de kamer de schoon oet en op het bed geploft. Ofja, het bed plofte weinig. Ik zoog 'n appje van Travelcounsellor Bram met de vraog of ik mien reis woei doorzetten wegens de problemen met corona. Ja jao, zeker! Mich lang zat op verheugd en we gaon gewoen door wies het nimmer kin. Snel slaope en morgen geijt deze Minskukel naor Minsk. Mien Poolse buren waren nogal luidruchtig aan het indrinken dus ik kos neet slaope. Kurwa! Ff de tillefoon gepakt. Op de site van de NOS zoog ik det Oekraïne de grenzen gesloten heij. Klotekoek. Bram geappt: wat is wijsheid?  Wat doon de landen? Sloeten ze snel de grenzen? Oeteindelijk besloten noow naor hoes te komen. Wiër as Minsk zou ik toch neet komme in dees situatie. Ik kos of naor hoes, of vastzitten in Vilnius of vastzitten in Minsk...den kies ik veur naor hoes. Potverjandriedubbeltjes. Ik baal wie 'n stekker. Of 2 stekkers. Dink wal mier eigenlijk. Maar good. Genog gezeen en gedaon in dees (te) korte periode. Halsüberkopf 'n ticket geboekt veur de truukreis, koffer ingepakt en 'n taxi zeuken naor de luchthaven. Dit waar sneller gedaon den ik dacht. Ideaal det Bolt, kinse gewoen live zeen welke taxi er beschikbaar is, wae de chauffeur is en wat de kosten zien. Ik ging per ongeluk op de bril van de chauffeur zitten, dus ik heb 'm maar mier geld gegaeve. Welke taxichauffeur legt ziene laesbril ouk op de beejriejjersstool.... Vuuls te vruug kwaam ik aan op Vilnius Airport en daor zoog ik de volgende mededeling:

Volgens mich heb ik de juuste keus gemaakt, er zien al verschillende vluchten gecanceld.

Helaas 'n minder leuk en abrupt einde van de reis. Ik mot het drmeij doon. Binnenkort nao alle Corona sores maar 'ns kieke wie we het gemiste stuk kinnen gaon inhalen! Ik heb genoten en zal het zeker euverdoon. Ik hoop det ge 'n bietje fijn gelaeze hebt. Op naor Bree den maar. We zeën ôs.

"Reizen, reizen en nog eens reizen. Als iedereen net zo veel zou reizen als ik, dan was er nooit iemand thuis." - Chris Zegers